How did I come out to my parents

Location: Marriott Hotel, RW Manila Room 506
Date: Jan 20, 2011, 2 hours before leaving Manila


Sa totoo lang,wala talaga akong planong mag-out sa magulang ko kasi hindi ko maamin sa sarili ko na ganito ako. Ni hindi ko nga mabangggit ang salitang "bakla" kasi nandidiri akong bigkasin yun. Gusto kong magkapamilya at magka-anak. Bago ako pumunta dito sa US, buo sa loob ko na baguhin ang buhay ko. Maghanap ulit ng girlfriend, magpakasal at magbuo ng pamilya. Pero hindi nangyari yun kasi alam kong niloloko ko lang ang sarili ko. Habang patanda ako ng patanda, parang sumisikip ang mundo ko.

Hanggang sa matanggap ko na rin sa sarili ko na ganito talaga ako, paikot- ikutin ko man ang mundo, ilang beses ko mang labanan, alam ko sa sarili ko na lalake ang gusto ko. Tama na ang pagpapanggap. Tama na ang pagkukunwari. Tigilan na ang kasinungalingan.

Ilang beses ko itong pinag-isipan,magiging masaya ba ako sa gagawin ko? matatanggap ba nila ako? ano na ang mangyayari sa buhay ko? magtatago na lang ba ako lagi? handa ba akong makarinig ng mga pangungutya sa mga tao? ano na lang sasabihin ng mga kamag-anak ko? ng mga kaibigan ko? tatanda ba ako mag-isa?

Basta ang dami kong tanong. Hanggang dumating ang araw na wala na akong pakialam. Parang naging manhid na ako. Buhay ko ito. Ayaw ko ng mabuhay na iniisip kung anong sasabihin ng iba. Hindi nila ako pinapakain, hindi nila ako binubuhay. Hindi na ako magpapa-apekto sa kanila. Wala akong sinasaktan at alam kong di ako masamang tao. Maiksi lang ang pakikipagsapalaran natin sa mundo at ayokong punuin ito ng kasinungalingan.

Sawa na ako.

Ayaw ko ng magtago.

Ayaw ko ng isakripisyo ang kaligayahan ko.

Wala na akong pakialam.

Bago pa ako umuwi ng Pilipinas, naisip ko ng mag-out sa magulang ko. Kung tatanungin nila kung bakit di pa ako ako nag-aasawa, di na ako magsisinungaling. Aamin na ako. Nakapagtataka, sa halos tatlo't kalahating linggong bakasyon ko, hindi man lang nila ako tinanong tungkol doon. Alam kasi nilang "inis" ako pag yun lagi ang pinag-uusapan, mabuti na ring hindi naungkat baka masira ang buong bakasyon namin.

Hindi ko alam kung anong nakain ko sa araw na yun pero alam kung buo na ang loob ko para sabihin sa kanila ang totoo. Sabi ko sa sarli ko, kung hindi ko masasabi sa kanila ngayon, kailan pa? Mahal na mahal ko sila at ayaw kong nagsisinungaling sa kanila. Pero alam kung magiging pasakit ito para sa magulang ko, parang iiwan ko silang sobrang lungkot- una, paalis na naman ako, pangalawa, ang pag-amin ko.

Nasa kabilang kama si Tatay at Nanay abalang nanood sa isang cooking show sa TV, si bunsong kapatid naman nasa isang kama hawak ang laptop. Ako nakaupo lang, malapit sa bintana naghihintay ng magandang tiyempo.

Isang malaking buntong hininga.

May sasabihin akong importante sa inyo, sabay tingin sila sa akin.

I'm gay.

Biglang umiyak si Nanay at ang kapatid ko.


Itutuloy...